Tað er í løtuni eitt sindur ógreitt, hvar framtíðin hjá Brian Laudrup liggur.
Søgur hava gingið í donsku fjølmiðlunum um, at Brian Laudrup hevur havt samband við FC Keypmannahavn.
Hesi tíðindini avsannaði FCK fyrrapartin í gjár, har stjórin í felagnum, Flemming Østergaard, m.a. segði, at »eingin avtala er gjørd við Chelsea um Brian Laudrup« og »FC Keypmannahavn ikki hevur gjørt nakra avtalu við Brian Laudrup.«
Men tíðliga seinnapartin í gjár skrivaði danska TV2 á síni internetsíðu, at Chelsea hevði kallað til tíðindafund klokkan 16.00 føroyska tíð (aftan á evstamark hjá blaðnum), har eittans punkt var á dagsskránni, nevniliga: »Rygter i forbindels med Brian Laudrups forestående klubskifte.«
Tá blaðið fór til prentingar, vistu vit ikki, hvat kom fram á hesum fundinum hjá Chelsea, men bæði Brian Laudrup og FCK eru gott stoff í donsku fjølmiðlunum.
Um nakað hald er í tíðindunum, fáa vit so at síggja.
