Okkurt bendir á, at forsetin í Venesuela, Hugo Chavez, er verri sjúkur, enn myndugleikarnir har hava sagt í seinastuni. Í øllum førum hevur Venesuela nú útsett ein toppfund, sum londini í Latínamerika og Karibia skuldu halda á venesuelsku oynni Margarita 5. og 6. juli.
Hugo Chavez varð lagdur undir skurð í Havanna í Kuba tann 10. juni fyri onkra sjúku í undirlívinum. Myndugleikarnir hava sagt, at skurðviðgerðin gekk væl, og at forsetin fór at verða førur fyri at taka lut á toppfundinum á Margarita. Men nú er toppfundurin útsettur í óásetta tíð.
Tveir latínamerikanskir diplomatar siga við tíðindastovuna Reuters, at toppfundurin er útsettur, so Hugo Chavez skal fáa betri stundir til at koma fyri seg eftir skurðviðgerðina.
