Fyrrverandi nevaleikarin Hector "Macho" Camacho, sum var heimsmeistari í trimum vektflokkum, doyði í nátt á einum sjúkrahúsi í heimlandinum Puerto Rico av skaðanum, sum hann fekk, tá ókendir menn skutu hann í høvdið týskvøldið.
Camacho sat í bili sínum uttan fyri eitt vertshús í høvuðsstaðnum San Juan, tá ókendir menn skutu eftir honum og einum øðrum manni. Hin maðurin doyði beinanvegin, og Camacho varð fluttur á sjúkrahús. Fyrradagin staðfestu læknarnir, at hann var heiladeyður, og í nátt doyði hann.
Camacho var heimsmeistari í nevaleiki í trimum vektflokkum í 1980-árunum. Sum professionellur vann hann 79 dystir og tapti seks. Hann var 50 ára gamal, nú hann doyði.
