Tað er nú eisini greitt,at bólkurin Byrta, verður ein av teimum, sum fara at syngja og spæla á Tórsfestini, sum verður mitt í Havn, leygarkvøldið 25. juli.
Frammanundan er greitt, at Pretty Maids og Basshunter, koma uttanlands at framføra og av føroyskum bólkum kunnu nevnast, Týr, Swangah, Frændur, Hjarnar, Sakaris, SIC, Goresquad, Signar & John, og onnur.
Og nú er so greitt, at eisini poppbólkurin, Byrta, fer at spæla á Tórsfest leygarkvøldið 25. juli.
- Løg, sum Norðlýsið, Loyndarmál, Eydnan og Í tínum eygum. hava brent seg inn í heilan á teimum flestu, og verða tráspæld í útvarpsrásunum, staðfesta fyrireikararnir.
- Og tær konsertirnar, Byrta higartil hevur spælt, hava víst, at talan er um ein bólk, sum bæði hugsar í tónleiki og framførslu, og sum dugir at fáa allar áhoyrararnar við. Tí verður tað uttan iva ein dansiveitsla av teimum heilt stóru frammanfyri pallin hjá Byrta á Tórsfest, halda fyrireikararnir.
Tórsfestin verður í Gongugøtuni í Havn og hetta er annað árið á rað, at Tórshavnar Ítróttarráð skipar fyri.
