Leikskráin hjá A-landsliðnum við monnum til komandi HM-undankapping er komin upp á pláss. Føroyar byrja á útivølli móti Moldova tann 25. mars, skrivar Fótbóltssambandið á heimasíðuni.
Mánadagin var lutakast í Zurich í Sveis, har greiðast skuldi fáast á, hvussu londini í Evropa skuldu bólkast til komandi HM-undankapping fyri A-landslið við monnum. Føroyar komu í bólk F, saman við Danmark, Eysturríki, Skottlandi, Ísrael og Moldova.
Síðan hevur UEFA gjørt leikskránna, og nú er greitt, at føroyska liðið byrja á útivølli móti Moldova í mars, og endar í Ísrael í november.
Av tí at Føroyar eru eitt “vetrar-land” í UEFA høpi, verða allir okkara heimadystir spældir í september og oktober. Tríggir dystir verða í Føroyum í september, og tveir í oktober. Útidystirnir verða tískil spældir í mars og í november.
Skráin sær soleiðis út:
25. mars
Moldova – Føroyar
28. mars
Eysturríki – Føroyar
31. mars
Skotland – Føroyar
1. september
Føroyar – Ísrael
4. september
Føroyar – Danmark
7. september
Føroyar – Moldova
9. oktober
Føroyar – Eysturríki
12. oktober
Føroyar – Skotland
12. november
Danmark – Føroyar
15. november
Ísrael – Føroyar
Væntandi verða tveir venjingardystir á skránni í juni mánað, men hvørji mótstøðulondini verða, er ikki endaliga greitt enn.
