Í næstum verður fari undir heilsufótbólt 60+ í Vágum. Tað eru Sørvágs kommuna og Vága kommuna, ið fara at bjóða sínum borgarum hetta tilboð, skrivar FSF.
Í samstarvi við Klaksvíkar kommunu og Fróðskaparsetur Føroya varð í heyst skipað fyri einari granskingarverkætlan við heilsufótbólti 60+. Verkætlanin eydnaðist væl, og hevur FSF í hesum sambandi samskift við aðrar kommunur um líknandi tilboð fyri borgarar í 60+ aldursbólkinum.
Tí verður fegnast um, at bæði Sørvágs kommuna og Vága kommuna nú fara at bjóða heilsufótbólt fyri hendan aldursbólkin. Í farnu viku skipaði Fróðskaparsetur Føroya fyri skeiði fyri teimum, sum koma at standa fyri venjingunum, og nú er klárt hjá luttakarum at melda til.
– Eg eri sera glaður um, at vit nú kunnu bjóða okkara 60+ borgarum hetta tilboð. Eftir at hava fylgt við á síðulinjuni, hvussu hetta heilsuátak hevur riggað hjá Klaksvíkar kommunu, valdu vit eisini at bjóða tað út sum liður í ABC fyri sálarligari heilsu hjá Fólkaheilsuráðnum, ið vit eru partur av, sigur Bjarni Prior, borgarstjóri í Vága kommunu.
Kommunurnar í Vágum samstarva um heilsufótbóltin og hava savnað eitt toymið við fimm persónum, ið koma at hava ábyrgdina av venjingunum. Vant verður tó í tveimum ymiskum bólkum, ið koma at venja í ávikavist Vága kommunu og Sørvágs kommunu. Fyri fyrst verður vant í 9 vikur (fram til 30. juni), og um undirtøkan er góð, er ætlanin at byrja aftur í august mánað.
Eisini í Sørvági eru tey til reiðar at fara undir heilsfótbólt.
– Vit eru sera spent at byrja hetta tilboð, og vóna sjálvandi at okkara borgarar taka væl ímóti hesum, sigur Eyð Ellingsgaard, borgarstjóri.
Venjingartíðir og tilmelding
Kunningarfundur fyri øll tilmeldaði verður á Dungasandi í Sørvági mikudagin 3. mai klokkan 16:30. Í samband við kunningarfundin verður eisini møguleiki at fáa gjørt eina heilsukanning. Venjingartíðir í Vága kommunu eru týsdag klokkan 16:30 til 17:30 í Miðvági, fríggjadag klokkan 16:30 til 17:30 í Sandavági.
Venjingartíðirnar í Sørvágs kommunu eru mánadag klokkan 16:30 til 17:30 á Dungasandi í Sørvági, og mikudag klokkan 16:30 til 17:30 á Dungasandi í Sørvági
Hvat er heilsufótbóltur?
Heilsufótbóltur er ikki nakað nýtt fyribrigdi, men hevur áður ikki verið beinleiðis málrættaður til hendan aldursbólkin. Tað, sum eyðkennir heilsufótbólt er, at spælt verður á smærri økjum og í minni bólkum. Tað er sostatt ein øðrvísi háttur at spæla fótbólt, og leggur veruliga upp til, at øll kunnu vera við – roynd, sum óroynd.
