Bygginevndin, sum skal gera byggiskrá og fyrireika byggingina av tjóðleikahúsi, er nú farin til verka. Nevndin, sum Bjørn Kalsø, landsstýrismaður í mentamálum, hevur sett, hevði sín fyrsta fund í Mentamálaráðnum í dag.
Yrkisleiklistin hevur vánaligar hølisumstøður, og eitt av høvuðsendamálinum við nýggja tjóðleikhúsinum, sum eftir ætlan skal standa liðugt í 2019, er at gera umstøðurnar hjá yrkisleiklistini tíðarhóskandi.
Játtaðar eru 5 milliónir krónur á Løgtingsfíggjarlógini til endamálið í ár. Harafturat eru settar av á langtíðaríløguætlanini: 3 milliónir krónur í 2017, 13,5 milliónir krónur í 2018 og 28,5 milliónir krónur í 2019.
Limirnir í bygginevndini eru:
Bjarni Wilhelm, deildarstjóri í Mentamálaráðnum, formaður
Jenny C. Petersen, stjóri á Tjóðpalli Føroya
Jóan Petur Hentze, trivnaðarstjóri í Tórshavnar kommunu
Árni Baldvinsson, ljóstøkningur
Alda Joensen, fulltrúi í Mentamálaráðnum, skrivari
Landsverk er ráðgevi, og umboð eru Mikael Viderø, deildarleiðari, og Birita Wardum, arkitektur.
