At oljan fór at vera so kraftiga misnýtt av Tjóðveldisflokkinum uppundir hetta Fólkatingsvalið mundi neyvan vara nakran. Tað grovasta og mest undirgravandi dømi fyri vunnin føroysk rættindi var lýsingin frá Tjóðveldisflokkinum við stórari mynd av varaløgmanni í Dimmalætting í gjár.
Varaløgmaður sáar alment iva hvørt føroyingar hava rættin til oljuna. Hetta ger varaløgmaður, hóast fremsta serfrøðin og ikki minst allir seriøsir politiskir flokkar eru á einum máli um, at sjálvandi hava føroyingar rættin til oljuinntøkur eins og vit hava rættin til fiskivinnutilfeingi, skattinntøkur í Føroyum o.s.fr. Hvussu við fiskinum á grunnunum - eiga vit hann? Sjálvandi gera vit tað, og hví skuldi oljan verið øðrvísi?
Tjóðveldisflokkurin er við fínum orðum follin aftur í sína destruktivu støðu frá 50?unum, har vit føroyingar einki kunna og einki eiga, uttan loysingin er framd.
Danski løgmálaráðharrin sigur ikki eitt orð um olju í citatinum, sum Høgni Hoydal vendir til, at vit fara at fáa eitt "eljustríð um oljuna". Her er einki at stríðast um, um bara føroyskir politkarir lata vera við at vísa almenna undirbrotligheit og sáa iva, sum kann gagna óseriøsa partin av fjølmiðlunum. Høgni Hoydal gevur Dansk Folkeparti góð kort á hondina, um teir kunnu vísa á, at varaløgmaður í Føroyum ivast í avtaluni frá 1992.
Føroyskir politikarir mugu ikki ganga serfrøðini ímóti og alment sáa iva um eina klokkuklára avtalu. Hví vil varaløgmaður yvirhøvur gera nakra avtalu við donsku stjórnina, um einki ber til allíkavæl uttan fullveldi?
Føroyingar hava eina kolvetnislóggávu, eina kolvetnisskattalóggávu og eina kolvetnisskattumsitingarlóggávu, sum Tjóðveldisflokkurin sjálvur hevur verið við til at lagt fram og samtykt. Hví samtykkir Tjóðveldisflokkurin slíkt, um teir ikki trúgva uppá avtaluna frá 1992? Hví yvirhøvur luttaka í heimastýrispolitikki, um einki er haldbart uttan fullveldi?
Vónandi gevast Tjóðveldismenn at undirgrava vunnin rættindi. So leingi føroyingar standa saman sum ein maður, so kann tað verða líka mikið, hvat danska pressan og Dansk Folkeparti diskutera niðri. Eitt er vist, at lýsingin hjá Tjóðveldisflokkinum í gjár hevur gjørt stóran skaða við at purra uppundir eitt óseriøst orðaskifti um eitt mál, ið sambært allari serfrøðini og seriøsum politiskum flokkum er avgreitt.
