Javnaðarflokkurin hevur samtykt á landsstevnu í Skopun í dag, at annar næstformaðurin skal vera í tingmanningini ella landsstýrismanningi hjá flokkinum.
Flokkurin hevur tveir næstformenn. Nú er samtykt, at annar skal vera í tingmanningini ella landsstýrisfólk, og hin, sum skal veljast á landsstevnuni, skal ikki vera fólkavaldur.
Aksel V. Johannesen, formaður í Javnaðarflokkinum, segði við Útvarpið á middegi, at tað kann koma fyri, at formaðurin fær forfall, og tá er praktiskt, sum hann málbar seg, at næstformaðurin, sum er løntur politikari, kann taka yvir.
Tað var eisini samtykt, at øll limafeløgini og ungmannafelagið skulu hava eitt umboð í starvsnevndini. Hetta er fyri at blása lív í limafeløgini, sum hava verið heldur tam, síðan landið varð skipað í eitt valdømi.
Roknskapurin hjá Javnaðarflokkinum, sum varð kunngjørdur fyrrapartin, vísti eitt hall á 2,1 milliónir krónur í 2011. Fólkatingsvalið og løgtingsvalið, sum vóru í 2011, kostaðu flokkinum slakar 1,6 milliónir krónur.
