Bygging
Havnar Timburhandil er nú farin undir at byggja nýggjan timburhandil á ídnaðarøkinum á Kambsdali. Heini Fossaa, stjóri, væntar, at bygningurin stendur fullreistur, tá ið henda vikan er liðug. Ætlandi verður nýggi timburhandilin liðugur at taka í nýtslu beint eftir summarfrítíðina ella tíðliga í september. Plássið inni í hitanum, tey rópa, verður einar 500 fermetrar; har verður vørusøla, skrivstovur, kaffistova og aðrir fasilitetir til starvsfólkið. Sjálv timburgoymslan verður 1100 fermetrar, og á økinum uttanum bygningin verða einir 2000 fermetrar planeraðir til goymslu av tilfari og tænastu til viðskiftafólkini, sum vitja handilin.
Heini væntar, at samlaði kostnaðurin av byggingini og planeringini av økinum uttan um fer at kosta einar 6-8 miljónir krónur.
Síðan 1989
Tað var í 1989, at Havnar Timburhandil keypti Snikkaravirkið á Kambsdali. Tey fyrstu árini helt virksemið, sum var í bygninginum, fram á sama hátt sum frammanundan við vindeygum, hurðum og øðrum.
- Men í 1993 avgjørdu vit at niðurleggja snikkaravirksemi og lata eina timburdeild við byggimarknaði upp.
Heini sigur, at seinastu 10 árini hevur timburhandil og byggimarknaður verið í bygninginum, og hetta virksemið fer at halda fram, til nýggi timburhandilin verður tikin í nýtslu tíðliga komandi heyst.
- Tað, sum vit nú gera, er at bøta um viðurskiftini hjá okkara arbeiðsfólki og okkara viðskiftafólkum. Í nýggja bygninginum verða arbeiðsumstøðurnar nógv betur; har verið minni handfaring av tilfari, og bæði timburgoymslan og vørugoymslan annars verða nógv størri og breiðari enn higartil.
Heini vísir á, at gamli bygningurin er ikki serliga væl egnaður til timburhandil, tí goymsluplássið er alt ov lítið.
- Í nýggja bygninginum verður ríkiligt av plássi, bæði inni og úti.
Hann vísir á, at Havnar Timburhandil fer at snøgga økið uttan um bygningin, soleiðis at tað verður reint og nossligt, tá ið handilin letur upp.
Tunnilin týdning
Heini dylur ikki, at tað hevur týdning fyri avgerðina at byggja nýggjan timburhandil á Kambsdali, at tunnilin undir Leirvíksfirði nærkast.
- Jú, tað er so avgjørt, at vit høvdu hetta frambrot á samferðsluøkinum í huganum, nú vit tóku støðu til byggingina.
Seks fólk eru knýtt at Timburhandlinum, sum er á Kambsdali, og tá ið nýggi bygningurin letur upp, verður talið av arbeiðsfólki á leið tað sama.
Heini Fossaa sigur, at Fuglafjarða kommuna hevur yvirtikið verandi bygning hjá Havnar Timburhandli á Kambsdali.
- Tað er soleiðis, at gamli bygningurin liggur uttanfyri ídnaðarøkið á Kambsdali, og skúlar liggja ímillum ídnaðarøkið og hendan bygningin. Vit ætlaðu at byggja verandi bygning út, men við tað, at hesin liggur uttanfyri ídnaðarøkið, spurdi Fuglafjarða kommuna okkum, um vit ikki heldur kundu koma ásamt um eina aðra loysn, har vit bygdu ein nýggjan bygning, og Fuglafjarða kommuna yvirtók verandi bygning.
Heini Fossaa sigur, at hetta gjørdist loysnin, og hann fegnast um, at nýggi timburhandilin nú stendur fullreistur í hesi vikuni, um alt gongur sum ætlað.
