Ólavur Johannesen, sum hevur verið formaður í Norðoya Rossafelag síðani tað varð stovnað í 2000 sigur, at tað eru 14 ross í Klaksvík.
- Í løtuni húsast rossini runt um í býnum, og nú tey eru blivin so nógv í tali, hevði verið gott at fingið eitt felags fjós, sigur Ólavur. Klaksvíkar Býráð hevur eisini heitt á felagið, um at fáa rossini út um býin, sigur hann.
- Ætlanin er, at keypa eitt grundøki á Norðoyri til fjós, sum kann húsa 20 rossum. Felagið hevur fáar limir og vóna vit at fáa stuðul frá býráðnum, sigur Ólavur.
Umframt Ólavur Jóhannesen, sita Valborg Laksáfoss og Nichels Lützen í nevndini hjá Norðoya Rossafelag.
Ymisk tiltøk
Rossini verða nýtt til bæði gaman og álvara. Á norðoyastevnu eru tey við í skrúðgonguni og á jólum, tá jólaskipið kemur á Klaksvík, eru rossini altíð og taka ímóti jólamonnunum.
Á norðoyastevnu verður vanliga skipað fyri ponyríðing, sum felagið fær nakað av vinningi av. Felagið er við í kappingum, har tey luttaka í 2. flokki, og ikki er sørt, at onkrum hevur eydnast at vunnið steyp. Eisini verða hestarnir nýttir til menningartarnað og rørslutarnað.
- Vit keyptu ross til son okkara, sum er spastikari. Ríðing er serstakliga gott hjá teimum, sum ikki kunnu ganga sjálvi. Hesturin hevur somu rørslur sum menniskju, tí fær tann rørslutarnaði íðka teir vøddar, sum annars verða ónýttir, sigur Ólavur.
Ólavur sigur, at hestarnir eisini verða nýttir til arbeiðis.
- Til dømi kann eg nevna, at rossini vóru við at bera kunsttøð, sum skuldi brúkast til at taða arrið eftir skriðulopið fyrraárið.
Fyrr í tíðini var neyðugt at hava ross til alt tað tunga arbeiðið, vit í dag hava maskinur til. Men hóast tað verður rossið ongantíð óneyðugt.
- Sjálvur eri eg við í Norðoya Bjargingarfelag - sum maður á hestbaki, sigur Ólavur Jóhannesen at enda.
