Nú eru ábendingar um, at byggivinnan í Føroyum hevur fótað sær aftur. Tað sæst í eini uppgerð, sum hagstovan hevur gjørt.
Uppgerðin vísir, at í apríl í ár vóru lønargjaldingarnar tilsamans eitt vet størri enn í apríl í fjør.
Kortini er nakað minni útgoldið av løn higartil í ár aftur ímóti sama tíðarskeiði í fjør. Tað var í februar at tað var serliga stór afturgongd í fiskivinnuni og er hetta ikki vunnið inn aftur enn. Orsøkin til tað var, at verkfall legði allan fiskiflotan lamnan.
Higartil í ár eru lønargjaldingarnar smáar 2,2 milliardir krónur og tað eru 16 milliónir krónur minni, ella 0,7% minni enn í 2010.
Størsta minkingin er í fiski- og aðrari ráevnisvinnu har afturgondin er 3,1%, men størsti vøksturin er í byggivinnu og aðrari tilvirking har 2% meira er útgoldið í løn.
Sostatt sæst, at byggivinnan hevur fótað sær aftur.
Frá 2005 til 2008 var framgongd í byggivinnuni og bæði í 2007 og 2008 vuksu lønirnar yvir 10%. Men hetta vendi til eina eins stóra afturgongd í 2009 og 2010. Gongdin higartil í ár vísir at nú er vent í holuni og er tað aftur framgongd í byggivinnuni.
Talvan vísir gongdina í lønarútgjaldingum frá januar til apríl hesi síðstu árini.
