Føroyski búskapurin hevur havt gott rák tey seinastu árini og góðir fíggingarmøguleikar hava gjørt tað møguligt hjá mongum at seta føtur undir egið borð.
Bæði vinnan og tað almenna byggja eisini í góðum tíðum, hóast allar búskaparligar lærubøkur mæla tí almenna til afturhald í íløgum, tá virksemið í landinum er stórt. Hetta, fyri at tálma eftirspurningin, tvs. prísvøkstri og fyri minka um sveiggini í byggivinnuni.
Góðar tíðir í byggivinnuni skapa stóran eftirspurning eftir føroyskum handverkarum, og tá eftirspurningurin er størri enn útboðið av handverkarum, tá hækkar jú prísurin.
Góðir inntøkumøguleikar hava tí verið í byggivinnuni hesi seinnu árini og hetta sæst eisini aftur, tá hugt verið eftir, hvørjar føroyskar fyritøkur hava havt stórstan vøkstur, tey seinastu 4 árini.
Vinnarafyritøkurnar
Í oktober mánaða í fjør fyriskipaðið Business-line saman við danska vinnublaðnum Børsen eina gazelluráðstevun í Eik Banka í Havn, har 3 tær skjótast vaksandi fyritøkur í Føroyum vóru funnar og heiðraðar.
Høvuðskrøvini til eina gazellufyritøku eru tey, at bruttovinningurin, BV, skal vera meira enn tvifaldaður seinastu 4 árini, samstundis sum felagið ikki má hava havt hall nakað av hesum árum.
Vinnarafyritøkan 2007 gjørdist Sp/f Jóan Petur Vang, Oyri. Felagið er ein byggifyritøka, ið hevur sítt mesta virksemið í Sundalagnum.
Nr. 2 gjørdist Sp/f El.fo ið veitir tænastur innan el-inlegging, mest í høvuðsstaðarøkinum.
Nr. 3 gjørdist Sp/f Selmar Nielsen, arkitektur, ið rekur arkitektavirki í Tórshavn.
Sostatt átti byggivinnan allar gazelluvinnararnar í 2007.
26 gazellur í 2007
í 2007 vóru tilsamans vóru 26 føroyskar fyritøkur, ið kundu krýna seg við heitinum “gazella”. Av hesum 26 eru 9, ella meira enn triðja hvør fyritøka, ið hevur sítt mesta virksemið innan byggivinnuna:
Vøkstur í BV
Gazellufyritøkur í byggivinnuni 2003-2006
1. Sp/f Jóan Petur Vang , Oyri 438%
2. Sp/f El.fo, Argir 393%
3. Sp/f SN. Arkitektur, Tórshavn 283%
4. Sp/f Eikin, Tórshavn 253%
5. P/f 360* , Tórshavn 203%
6. Sp/f TN Bygging, Saltangará 198%
7. Sp/f Inventartænastan , Tórshavn 178%
8. Sp/f Húsavarðatænastan, Tórshavn 160%
9 Sp/f MAP arkitektar, Tórshavn 120%
Barometrið fellur
Sum øllum kunnugt er ferðin á føroyska búskapinum minkað nakaði hetta seinasta árið og hetta ávirkar eisini byggivinnuna.
Áhugavert verður tí at kanna, um vinnugreinin “bygging” megnar at halda tørn og aftur gerast gazelluvinnari í 2008. Tað fara vita at frætta nærri um til heystar.
Myndatekstur
Gazellutiltakið, sum Business-line saman við Børsen fyriskipaði í Eik Banka í fjør, fekk nógva umtalu í stóra danska vinnublaðnum BØRSEN.
Á myndini handar blaðstjórin á Børsen, Leif Bech Fallesen eina gazellustandmynd til Jóan P. Vang, gazelluvinnara í 2007. Við lið blaðstjórans stendur Bjarni Olsen, stjóri í Eik banka við heiðursskjali til vinnaran.
Mynd: Rógvi Sivertsen
Finnur Sivertsen, búskaparfrøðingur
Business-line
www.bl.fo
