FM KAPPRÓÐUR
Hóast sólin og hitin ikki høvdu tann leiklut í miðøkinum leygardagin, sum tað var lagt upp til í veðurforsøgnunum, so gekk tað væl at fáa FM kappróðurin á Kollafirði frá hondini.
Óvanligt fyri gongdina í kappróðrinum nógvu tey seinastu árini var tað, at so nógvar manningar, sum á Norðoyastevnu stóðu ovast á sigursskamlinum, hesa ferð noyddust at víkja plássið fyri øðrum vinnara.
Tað vóru bara tríggjar manningar, sum høvdu vunnið á Norðoyastevnu, og sum aftur vunnu á Kollafirði. Tær vóru í kappingini millum 5-mannafør við kvinnum, har Ørnin aftur hesa ferð sigraði, í kappingini millum 6-mannafør við monnum, har Sølmundur aftur hesa ferð var bestur, og so í kappingini millum 8-mannaførini, har Knørrur aftur hesa ferð var fremstur.
Í mong ár hevur Havnin og høvuðsstaðurin verið nógv tað stinnasta kappróðrarøkið. Har býr størsti parturin av unga fólkinum, og har hevur áhugin fyri at rógva kapp verið rættuliga stórur í mong ár.
Havnar Róðrarfelag er størsta felagið av sínum slagi í landinum, og Havnar Róðrarfelag plagar at vinna ofta og nógv. Merkisvert er tað, at tað higartil í ár ikki hevur eydnast manningum hjá Havnar Róðrarfelag at koma fyrstar á mál. Sjey róðrar vóru í Klaksvík, og sjey róðrar vóru á Kollafirði. Havnar Róðrarfelag hevur verið umboðað í tólv av kappingunum bara í kappingini millum 6-mannafør við kvinnum er felagið ikki við, men í fleiri kappingum er felagið umboðað av fleiri manningum - men tað hevur ikki eydnast at vinna nakað gullmerki.
Í báðum kappingunum, sum higartil hava verið, hava tvær manningar hjá Havnar Róðrarfelag vunnið silvurmerkini. Talan hevur í báðum førum verið um somu manningarnar. Tær hava verið kvinnurnar umborð á 5-mannafarinum Sílinum, og so 8-mannafarið Ørvur. Ein av spennandi spurningunum undan kappingini, sum verður leygardagin á Skálafjørðinum, er, um tað nú fer at eydnast aðrari av hesum manningunum ella kanska onkrari aðrari hjá Havnar Róðrarfelag at vinna. Bæði Sílið og Ørvur vóru ógvuliga nær sigrinum í Kollafirði.
Hóast Havnar Róðrarfelag ikki enn hevur havt eydnuna við sær ella marginalirnar á sínari síðu, sum tað plagar at verða tikið til, so hava aðrar manningar í høvuðsstaðnum gjørt um seg. Men eftir tvær av sjey róðrarstevnum er tað framvegis soleiðis, at bygdafeløgini í tali av sigrum liggja á teimum í høvuðsstaðnum.
Manningar í høvuðsstaðnum hava vunnið fimm róðrar: 8-mannafarið Knørrur hevur vunnið tvær ferðir, Jallur við dreingjum hevur vunnið eina ferð, Lómur við kvinnum hevur vunnið eina ferð, og Blikur við gentumanning hevur vunnið eina ferð.
Róðrarfelagið NSÍ er eitt av teimum stóru, og higartil hava manningar úr hesum felagnum vunnið tríggjar ferðir. Menninir umborð á Sølmundi hava vunnið tvær ferðir, og Eysturoyingur hevur vunnið eina ferð.
Manningar úr Sandavági hava vunnið tvær ferðir. Báðu ferðirnar hava tað verið kvinnurnar umborð á Ørnini. Manningar úr Miðvági hava eisini vunnið tvær ferðir. Fyrru ferðina vóru tað kvinnurnar umborð á Riddaranum, og seinnu ferðina vóru tað genturnar umborð á Frúnni. Norðuri í Sundi hava teir vunnið ein róður dreingirnir umborð á Rituni og í Klaksvík hava teir vunnið eina ferð. Tað var tá ið Klaksvíkingur leygardagin kom fyrstur á mál.
