Nýggja smápartafelagið, hvørs endamál var at endurreisa Dimmalætting í einum ella øðrum formi, tykist ikki fáa langa livitíð.
Felagið varð stovnað hálvan september við Árna Gregersen sum stjóra. Tá varð upplýst, at D Media var eitt dóttirfelag hjá gamla sp/f Dimmalætting, sum í sama viðfangi broytti navn til sp/f Bring. Gamli eigarin av Dimmalætting, Eyðfinn Reyðberg, helt tá fram sum stjóri í sp/f Bring.
Stutt eftir kravdu starvsfólkini á Dimmalætting sítt gamla arbeiðspláss í Skiftirættin, tí felagið skyldaði teimum bæði løn og eftirløn.
Sigmund Poulsen varð settur fyribil bústjóri fyri Sp/f Bring. Men í dag hevur bústjórin so eisini yvirtikið stýringina av sp/f D Media.
Árni Gregersen er farin frá sum stjóri, og Sigmund Poulsen hevur tikið við.
D Media varð stovnað við 80.000 krónum í partapeningi. Har vóru eingi onnur starvsfólk uttan stjórin.
Les eisini:
Vinnuvitan tikið úr Dimmalætting
Bústjóri kennir einki til Vinnuvitan.biz
