Á middegi í dag var reisigildi á Steig í Sandavági, har Bústaðir saman við Seve og Norðhús byggja fimm íbúðir.
- Arbeiðið hevur gingið skjótt og verður eftir ætlan handað síðst í oktober 2022, siga tey í Vága kommunu í dag.
Íbúðirnar verða bygdar í einari lon. Tær verða umleið 80 fermetrar til støddar hvør og hava køk & stovu í einum, tvey sovikømur og baðirúm.
Til hvørja íbúð hoyrir úthús og terassa, og íbúðirnar fara at verða hitaðar við jarðhita. Góð parkeringsviðurskifti eru á økinum.
Borgarstjórin í Vága kommunu, Bjarni Prior, er farin í summarfrí, og tí var varaborgarstjórin, Albert Ellefsen, sum nú er virkandi borgarstjóri, við til reisigildið á Steig í dag.
Bjarni Prior verður aftur aftur í starvinum sum borgarstjóri í Vága kommunu hin 1. august, og fram til ta tíð røkir Albert Ellefsen uppgávurnar hjá borgarstjóranum.
