Tað er eingin loyna, at nógvur vindur er í Suðuroynni í dag, sum boðað frá áður.
Bygdaleiðir avlýstu koyringina fyrr í dag, og tað tykist hava verið rætta avgerðin, tí seinnapartin varð ein bussur blástur av vegnum oman fyri studentaskúlan í Hovi.
Vakthavandi á løgreglustøðini sigur, at hann ikki er greiður yvir, hvat slag av bussi tað var, men keldur hjá in.fo siga, at talan er um ein buss hjá M.P. Bussar, sum tekur sær av skúlakoyringini har suðuri. Ikki er greitt, júst hvussu nógv vóru í bussinum.
Vakthavandi boðar tó frá, at bussførarin sjálvur hevur boðað frá, at eingin er komin til skaða. Sjúkrabilar eru kortini sendir á staðið.
- Tað er øgiliga nógvur vindur har suðuri og aðra staðni í Hovi er ein hjallur farin í luftina. Tíverri sær tað ikki út til, at hann fer at minka um vindin fyrr enn út móti miðnátt, sigur vakthavandi av løgreglustøðini í Havn.
