Enn er stórur spenningur um fjórða plássið í Burn Mansdeildini, men StÍF hevur fyribils vunnið sær ein fyrimun við at vinna harðvunnan 26-25 heimasigur á Kyndli í dag aftaná eitt framúr gott avrik í seinna hálvleiki. Kyndil var á odda 14-11 í steðginum, men í seinna hálvleiki bumbaði supertalentið hjá StÍF, Bjarni í Selvindi bólt aftaná bólt í málið hjá Tórði S. Guttesen, og hann skoraði helvtina av teimum 26 málunum hjá StÍF, 13 mál.
StÍF kann sostatt halda jól og nýggjár á fjórða plássinum við 11 stigum. Tvey stig frammanfyri Team Klaksvík og trý stig frammanfyri Neistan og Kyndil. Í komandi umfarinum 23. februar spælir StÍF móti Team Klaksvík í Badmintonhøllini. Ein sera avgerandi dystur í stríðnum um fjórða plássið.
KÍF hevur tryggjað sær pláss í FM-endaspælinum við 28-23 sigri á VÍF í høllini í Kollafirði. Sigurin merkir, at KÍF endar í ringasta føri á triðja plássinum í grundspælinum. KÍF var á odda 17-13 í steðginum.
H71 er ikki til at steðga, og í dag vunnu hoyvíkingar tryggan 32-24 sigur á Team Klaksvík í Hoyvíkshøllini. H71 var á odda 13-11 í steðginum. Vuk Stevanovic skoraði heili 11 mál fyri Team Klaksvík, men tað munaði langt frá nóg mikið hjá Team Klaksvík.
Nú kemur vetrarsteðgur, landsliðsvikuskiftið og steypakapping.
StÍF-Kyndil 26-25 (11-14)
Málskjúttar StÍF: Bjarni í Selvindi 13, Pætur Barclay 5, Jóannes Prestá 3, Ivan Mrdalo 2, Martin Danielsen 1, Bjartur Már Guðmundsson 1, Georghe Patrea 1.
Málskjúttar Kyndil: Kristoffur Bjørgvin 7, Anders Risdal 6, Tróndur Wardum 4, Jóan Pauli Patursson 2, Mads Lindkvist 2, Ovi Lützen 2, Dánjal Sørensen 1, Borgar Sveinsson 1.
KÍF-VÍF 28-23 (17-13)
Málskjúttar KÍF: Morten N. Kristensen 7, Fríði Weyhe 5, Hans Eli Sigurbjørnsson 4, Nicklas Selvig 4, Tony Weyhe 4, Rúni Joensen 2, Bárður Dam 1, Ási Dam 1.
Málskjúttar VÍF: Filip Jojic 10, Hallur Árason 4, Hanus Christophersen 4, Jóhan í Garðastovu 3, Rúni Fossdal 2.
H71-Team Klaksvík 32-24 (13-11)
Málskjúttar H71: Pætur Thomsen 9, Pauli Mittún 8, Óli Mittún 6, Rókur Ziskason 4, John S. Vilhelm 2, Poul Símun í Garði 1, Niklas H. Hanusarson 1, Jón Rói M. Høgnesen 1.
Málskjúttar Team Klaksvík: Vuk Stevanovic 11, Jens Pauli Mohr 5, Vilhelm Vilhelmsen 3, Tummas Simonsen 2, Sámal á Tjaldrafløtti 1, Beinir Johannesen 1, Ludvík Súnason 1.
Støðan (hsf.fo) | Dystir | Vunnin mál | Tapt mál | Munur | Stig |
---|---|---|---|---|---|
H71 (eru víðari til FM-endaspælið) | 14 | 443 | 329 | 114 | 24 |
KÍF (eru víðari til FM-endaspælið) | 13 | 358 | 326 | 32 | 20 |
VÍF | 14 | 395 | 371 | 24 | 14 |
STÍF | 14 | 384 | 442 | -58 | 11 |
TEAM KLAKSVÍK | 13 | 356 | 386 | -30 | 9 |
NEISTIN | 12 | 338 | 350 | -12 | 8 |
KYNDIL | 14 | 334 | 404 | -70 | 8 |