Einki starvsfólk á norsku sendistovuni í Kabul fekk skaða, tá ein bumba brast nærhendis sendistovuni í morgun. Afghanskir myndugleikar siga, at millum fimm og tíggju sivilfólk doyðu av spreingingini.
Norski sendiharrin í Afghanistan, Kåre R. Aas, sigur við Bergens Tidende, at vindeygu og hurðar á sendistovuni vórðu trýst inn av bumbuni.
Reuters skrivar, at tað var ein sjálvmorðsbumbumaður, sum sprongdi bumbuna. Maðurin sat í einum bili, tá hann sprongdi seg í luftina, skrivar tíðindastovan.
