Í Vága kommunu hava tey sett Búgva Róin í starv sum gartnara í kommununi.
- Vit hava við Visjón 2032 sett okkum fyri, at raðfesta býarumhvørvið, trivnað og burðardygga menning sum nakrar av grundsúlunum undir kommununi næstu 10 árini.
Tað siga tey í Vága kommunu í dag.
- Sum ein part av hesum, ynskja vit at menna tað grøna økið á ein burðardyggan hátt til frama fyri býarumhvørvið og trivnað. Í tí sambandi varð søkt eftir einum gartnara at hava ábyrgdina av grøna økinum í kommununi um hendi.
Saman við einum toymi av dugnaligum starvsfólkum, kemur Búgvi nú at hava yvirskipaðu ábyrgdin av grøna økinum hjá Vága kommunu um hendi.
- Hetta umfatar skipan og viðlíkahald av viðarlundum og miðstaðarøkjum, umframt at skapa og skipa møgulig nýggj grøn átøk og verða toghaldari á verkætlanum á umhvørvisøkinum.
Uppgávurnar hjá gartnaranum fevna eisini um at fríðka uttanfyri stovnar, skúlar, sambýli, kirkjugarðar og annað.
Búgvi Róin er 50 ár og útbúgvin anlegsgartnari í Stenstrup við Svendborg á Fjóni. Hann hevur drúgvar royndir á økinum.
- Síðan hann varð liðugt útbúgvin í 1999, hevur hann virkað sum gartnari í Føroyum - við egnari gartnarafyritøku frá 2000 fram til 2017. Seinastu seks árini hevur hann starvast sum býargartnari hjá Runavíkar kommunu.
Í Vága kommunu siga tey, at Búgvi er ógvuliga tilvitaður um umhvørvi og náttúruvernd, og hann leggur eitt nú dent á at skilja og endurnýta avgrevstur og annan vøkstur.
- Sjálvur annar hevur hann givið út vælumtóktu "Urtagarðsbókina" fyri ársskiftið 2022, har hann stóð fyri tí fakliga tekstinum í bókini.
Búgvi Róin byrjar í starvinum hjá Vága kommunu mánadagin hin 19. juni.
