Fram til ólavsøku fer ikki at bera til at koyra eftir Bryggjubakka frá Vágsbotni, tí at Tórshavnar býráð fer at gera eina trappu niðan móti Bojsensgarði.
Tað er sum liður í arkitektakappingini um miðbýin í Havn, at hugskotið um at gera eina uppihaldstrapu á økinum, har Perlan í sínari tíð stóð, kom upp. Í morgin verður farið undirverkætlanina, og í tí sambandi verður vegurin niðan á Bryggjubakka frá Vágsbotni av stongdur - og hann letur ikki uppaftur í bræði – ikki fyrr enn á ólavsøku.
Til ta tíð noyðast reynafólk at koyra eftir Avhaldsbrekkuni milllum Gamla Bókhandil og Apotekið fyri at sleppa út á Reyn.
Tórshavnar býráð sigur í fráboðan, at í sambandi við at vegurin á Bryggjubakka verður endurnýggjaður, og trappa verður gjørd millum Bryggjubakka, Boysensgarð og Mylnugøtu, verður Bryggjubakki stongdur frá Vágsbotni til Bringsnagøtu frá týsdegnum 7. apríl kl. 08.00 og til á ólavsøku.
Í hesum tíðarskeiðinum fer øll ferðsla út á Reyni eftir Húsabrúgv.
Talan er um eina uppihaldstrappu, ið er staðsett á tríhyrninginum, millum Mylnugøtu, Bryggjubakka og Bojsensgarð og kemur hon millum annað, at binda økið framman fyri Bojsensgarð og torgið í Vágsbotni saman. Tað er økið, har Perlan stóð í sínari tið.
Trappan er eitt av átøkunum hjá Zeta-Architects , ið fingu 1. virðisløn í hugskots- og prosjektakappingini um miðbýin í Tórshavn, 2014.
Vegurin Bryggjubakki og brekkan niðaná, verða dagførd og skuldi hetta bøtt um umstøðurnar, bæði hjá gangandi og koyrandi ferðslu.
Umframt uppihaldstrappuna og vegin, verður ætlandi byrjað upp á arbeiðið at byggja upp í bygningin hjá Poul Hansen á Bryggjubakka 4- 8.
Tórshavnar Kommuna hevur fyrr boðað frá, at trý tilboð komu inn at gera uppihaldstrappuna, og Býráðið valdi at taka av bíligasta tilboðnum, sum var frá Sp/F Andrias Berg. Hetta tilboðið var á 2,3 milliónir krónur.
Zeta Arkitektar standa enn fyri arbeiðinum at tekna trappuna, og í mun til upprunaligu skitsuna, tá felagið mælti til at nýta ljóst betong, verður nú arbeitt við at byggja trappuna úr føroyskum gróti.
