Herverk
Leygarkvøldið var dansur og nógv fólk í Royn-høllini í Hvalba.
Tá ið náttin hasaði av, vóru átta rútar færri heilir á flakavirkinum í Hvalba.
Løgreglan í Suðuroy sigur, at onkur hevur gjørt seg inn á virkið sunnunáttina, og átta rútar eru knústir.
Hetta eru alt termurútar, og teir eru dýrir.
- Vit kunnu ikki siga, at vit eingi spor hava at ganga eftir, men fólk, sum kanska vita eitt hvørt um tilburðin, eru vælkomin at venda sær til okkara, sigur løgreglan.
Í Suðuroy var annars friðarligt í vikuskiftinum.
- Okkurt minni ferðsluóhapp var, men annars gekk ferðslan væl, sigur løgreglan í Suðuroy.
