Hóast flatskatturin tók toppin av marginalskattinum og harvið skattarokningini hjá hægru inntøkunum, so er lønarskatturin framvegis alt ov høgur.
Tað er niðurstøðan hjá Jørgen Niclasen, landssstýrismanni í fíggjarmálum, sum tí arbeiðir við enn eini skattanýskipan.
Í Fíggjarmálaráðnum royna tey í hesum døgum at finna útav, hvussu inntøkurnar kunnu fáast inn á ein annan hátt enn higartil. Lítið hevur higartil verið at frætta frá hesum”hugskotskatalogi,” men tað tykist tó greitt, at endamálið er at lækka inntøkuskattin og í staðin áseta fleiri brúkaragjøld.
Á kjakfundi á Fólkafundinum gjørdu bæði Jørgen Niclasen og Johan Dahl greitt, at inntøkuskatturin skal niður.
- Tað er neyðugt at lækka inntøkuskattin og í staðin krevja pengarnar inn við brúkaragjøldum av ymiskum slag, sigur Johan Dahl, næstformaður í Sambandsflokkinum, sum umboðaði flokkin á kjakfundinum í Klaksvík leygarkvøldið.
Hóast hvassar atfinningar frá andstøðuni verjir Jørgen Niclasen flatskattin, sum kom í gildi 1. januar í fjør:
- Inntøkuskatturin var alt ov høgur. Og hóast flatskattin hava vit framvegis ov høgan inntøkuskatt, sigur Jørgen Niclasen, sum tí longu fyrireikar ein nýggjan skattareform, har inntøkurnar í størri mun skulu koma frá brúkaragjøldum.
Millum tey mest atfinningarsomu móti førda skattapolitikkinum er Aksel V. Johannesen, formaður í Javnaðarflokkinum og fyrrverandi landsstýrismaður í fíggjarmálum:
- Inntøkurnar hjá landskassanum svíkja og undirskotið veksur, bæði í fjør, í ár og væntandi aftur næsta ár, sigur Aksel V. Johannesen, sum framvegis skýrir flatskattin at raka sosialt skeivt:
- Tú byggir einki land við at tey múgvandi fáa betur ráð til at keypa nýggjan bil og ferðast oftari uttanlands, sigur Aksel V. Johannesen.
