Nakað av skaða hendi í bátahylinum í Sandavági leygarmorgunin. Tað var fløðandi sjógvur og barometri rættiliga lágt.
Eldri menn í Sandavági siga seg ikki vita um meira brim enn tað sama. Ættin var útsynningursunnan, sum teir meta vera ringa ætt til uppgang.
Serliga vóru tað teir smáu bátarnir, fýramannafør ella so, sum brimið gekk útyvir. Brimið legði yvir brimgarðin, og bátarnir koppaðu. Summir teira høvdu leysamotorar umborð, og teir eru so farnir fyri einki. Størru bástarnir tykjast ikki hava fingið nakran skaða.
Nú er einki óvanligt í, at brim er hesa tíðina, og fyrr hevur kyndilsmessubrim eisini verið tiltikið. Eitt nú verður tosað um kyndilsmessuna hørðu, sum segðist at fylla Saksun við sandi.
