Felagið Føroyar-Kuba verður 10 ár í ár, og tískil verður uttan iva gjørt okkurt serligt burturúr bæði í Havanna og í Føroyum.
Brigadistarnir búgva, sum vant, á »Campamento Internacionál Julio Antonio Mella« einar 45 km. vestanvert Havanna. Teir búgva saman við brigadistum úr Íslandi, Noregi, Danmørk, Svøríki, Finnlandi, Hálandi, Bretlandi, Írlandi og kanska øðrum londum við.
Men alt er ikki arbeiði. So langt ífrá. Tú fært góðar møguleikar og tilboð um at vitja støð, stovnar o.a. sum vanlig ferðafólk ikki síggja á sosialistisku tropuoynni. Harumframt kanst tú spáka ella koyra kring Havanna og nógva aðrastaðni. Onkur útferð upp á nakrar dagar verður gjørd til onkran annan landspart, og tú hevur góðar møguleikar at svimja við vøkru pálmaprýddu karibisku strendurnar. Helst verður eisini høvi at síggja seinasta gravstaðið hjá Che Guevara og nøkrum av hansara lagsbrøðrum, sum fullu í Bolivia. Í Kuba hittir tú einum fólki, sum hóast ágang og blokadu i 40 ár, eru sera fryntlig og fyrikomandi.
Mong mentunartiltøk o.a. fara fram á leguni og aðrastaðni, t.d. koma vanliga fleiri av teim kendu bólkunum út at spæla til dans, fyrilestrar verða hildnir um samfelagsviðurskifti.
Allastaðni verða brigadistarnir hávirdir, tí teir koma at hjálpa einum fólki, ið stríðist ikki bara fyri sínum egna frælsi, sosialismu og fullveldi, men eisini fyri rættvísiskrøvum í øllum heiminum, ikki minst í menningarlondunum.
Í stuttum kann sigast, at ein brigaduferð til Kuba er ein uppliving fyri lívið, og tú fær her vinir fyri lívið.
Treyt fyri at sleppa við, er limaskapur í Felagnum Føroyar-Kuba. Talið av ferðaseðlum er avmarkað, so vinarligast sigið frá hjá Felagnum Føroyar-Kuba, P.O. Box 2055, 165 Argir. Skrivstovan er flutt til Stoffalág 40, 1. t.h. har er vanliga opið mikudagar kl. 16-18. Tlf. og fax: 313016. Teldupostur: far_cuba@hotmail.com, annars kann ringjast til 312098 (Høgni) ella 310184 (Jóan Magnus). Visum krevst, men tað útvegar felagið ókeypis.
Seinasta freist at tekna seg er 1 mai 1999, so tað hevur skund, um tú ætlar tær við.
Felagið vil samstundis takka øllum, sum hava útvegað skrivimaskinur og onnur skúlating til »2. desember-skúlan« í Cotorro, Havanna. Eisini nevndur føroyski skúlin í Havanna, tí føroyingar stuðla hesum skúla. Somuleiðis takka vit Skipafelagnum Føroyar fyri ókypeis flutning fyrsta partin av leiðini úr Føroyum.
