Hann er føddur í Noregi, hevur útbúgving, hevði sína egnu fyritøku og hevur ongantíð framt nakað lógarbrot uttan okkurt smávegis brot á ferðslulógina fyri 10 árum síðani.
Hann kundi verið ein miðalhampaborgari í einum norðurlandi, men fríggjadagin framdi hann óndastu illgerðina, sum er framd í friðartíð í Noregi.
Anders Behring Breivik sprongdi eina bumbu mitt í Oslo, og síðani slaktaði hann ungdómar á oynni Utøya. Samanlagt hava helst eini hundrað fólk latið lív, leitað verður framvegis eftir saknaðum, og summi eru á sjúkrahúsi við álvarsomum løstum.
Álop á samfelagið
Anders Behring Breivik er uppvaksin og hevur búð í Oslo, til hann fyri einum mánaði síðani flutti til ein garð í Hedmar, har hann helst hevur framleitt bumbu sína burtur úr eitt nú kunsttøð.
Fyri nøkrum árum síðani fór Breivik heilt til høgru politiskt. Hansara sjónarmið gjørdust alsamt meira viðgongd, og seinastu árini hevur hann skrivað eitt 1500 síður langt manifest um síni politisku sjónarmið.
Hann kallar seg sjálvan tjóðskaparsinnaðan og í hansara hugaheimi kunnu fleiri mentanir ikki liva saman í friði og náðum.
Tað var hetta, sum hann vildi gera upp við fríggjadagin. Álop hansara vóru á norska samfelagið og Arbeiðaraflokkin, sum hann heldur hevur virkað fyri, at oyðileggja norska samfelagið, soleiðis sum hann vil hava tað.
Verjin hjá Breivik segði sunnudagin við NRK, at Breivik viðgongur tað, sum hann hevur gjørt, men hann heldur seg ikki hava gjørt nakað skeivt, og at hansara gerðir ikki eru revisverdar. Tað var ein neyðug samfelagslig gerð, sum hann gjørdi.
Manifestið
Anders Behring Breivik hevur sent politiska manifestið til ymiskar persónar, millum annað til finska nasionalistiska politikaran, Terhi Kiemunki frá flokkinum Sannfinnene.
Ideologiska manifestið, ið er heilar 1516 síður, byrjar við at greiða frá, hvussu nógva tíð og pengar, hann hevur lagt í arbeiðið við manifestinum, og hann leggur eisini upp til, hvussu hann heldur, at manifestið skal breiðast út.
»Tíðin fyri talu er farin. Vit góvu friði ein møguleika. Tíðin er nú komin til vápnaða mótstøðu. PCCTS, Knights Templar vegna frælsu menniskjuni í Europa, boða hervið frá fyribyrgjandi kríggi móti mentanarligu marxistisku/multimentanarligu stjórnunum í Vestureuropa. Vit viðurkenna, at Europa tekniskt hevur verið í borgarakríggi síðani 1999, tá Europa og amerikanskir mentanarligir marxistar/multimentanalistar umvegis NATO fóru í álop móti kristnu serbisku styrkjunum, og frátók teimum rættin at steðga islam í teirra føðilandi«, skrivar Anders Behring Breivik í ideologiska manifestinum.
Anders Behring Breivik skuldi á middegi í dag fyri rættin í Oslo. Hann sigur seg hava verið einsmallan um álopini, men løgreglan kannar framvegis, um hann hevur fingið hjálp í Noregi ella úr øðrum londum.
Myndatekstur:
Anders Behring Breivik drap fríggjadagin úti við hundrað fólk í einum skilaleysum politiskum álopi í Noregi
Mynd: Polfoto
