Í morgin kemur norski hópdrápsmaðurin Anders Behring Breivik fyri rættin í Oslo, og tá fer hann at greiða rættinum og áhoyrarunum frá, hví hann myrdi 77 fólk í Oslo og á Utøya tann 22. juli. Fleiri avvarandi hjá teimum, sum doyðu, og fleiri av teimum, sum hann særdi, hava boðað frá, at tey fara í rættin at lurta, men tað ávirkar ikki Breivik, sigur sakførarin Tord Jordet við blaðið VG.
-Hann sigur, at hann er spentur at síggja, hvussu tað verður at møta teimum avvarandi og teimum særdu. Hann væntar, at fólk fara at rópa eftir sær, og at onkur kanska fer at royna at leypa á seg. Hann er fyrireikaður til alt, sigur sakførarin.
-Hann fer at siga frá teimum ræðuligu gerðunum, sum hann stúrdi fyri at fullføra, men sum hann helt vera neyðugar, sigur Tord Jordet við VG.
Anders Behring Breivik skal í rættin í morgin, tí rætturin skal taka støðu til, hvussu leingi hann skal sita í varðhaldi afturat.
