Á aðalfundi, ið var hildin í ÍSF húsinum í gjár, var nevndin í Ríðisamband Føroya endurvald. Brandur í Dali er formaður, Zacharias R. Jacobsen næstformaður og Símun Skaalum nevndarlimur.
Ríðisamband Føroya arbeiðir fyri at fremja ríðing sum ítrótt og fegnast nýggja nevndin um økta stuðulin nú býtislykilin hjá ÍSF bleiv broyttir í vár.
Brandur í Dali, formaður, sigur í stuttari viðmerking, at hetta fer at geva heilt nýggjar møguleikar innan ítróttina. Men hann leggur tó samstundis dent á, at tað er umráðandi at býtislykilin nú fær frið í nøkur ár, soleiðis at sersambondini fáa lagt langtíðarætlanir.
Fyrsta dømi um at nýggi býtislykilin ger mun hjá ríðingini, verður at síggja í komandi mánaði. Tá fara heili fýra reiðfólk við rossum til Norra, at kappast um norðurlandameistaraheitið í gonguløgum fyri íslandsross. Hetta hevði helst ikki verið gjørligt uttan øktu játtana frá ÍSF sigur Brandur í Dali at enda.
