- BR Leikur í Føroyum hava tað gott!
Tað sigur fyritøkan á sínari Facebook-síðu í kvøld, nú tað í dag er komið fram, at Top Toy, sum er móðurfelag hjá danska BR Legetøj og Toy´s "R" Us, fór á húsagang í dag, fríggjadagin 28. desember.
- Hesi tíðindi eru vit hørm um, siga tey hjá BR Leikum í Føroyum. Tey leggja aftrat, at hóast BR Leikur í Føroyum bera sama navn og samleika, sum BR Legetøj, so hevur húsagangurin ikki beinleiðis ávirkan á handlarnar í SMS og á Hálsi.
BR Leikur er nevniliga eitt føroyskt felag við sjálvstøðugum rakstri.
- Vit vilja við hesum boða frá, at handlarnir virka sum áður, og viðskiftafólk okkara kunnu enn sum áður:
* Býta gávur um
* Fáa pening afturgoldnan fyri vøru, sum ikki er brúkt/opna (kvittan krevst)
* Brúka gávukort, sum eru keypt í handlunum í Føroyum
* Keypa fyri BR sparimerkir, sum eru savnað í Føroyum
BR Leikur í Føroyum leggja aftrat, at tey í løtuni ikki vita, hvussu framtíðin hjá danska BR Legetøj verður, og møguliga fáa BR Leikur nýtt navn og aðrar veitarar av leikum. Meira kunning verður um hetta seinni.
