Fótbóltur
Longu tá 12 minuttir vóru farnir av dystinum millum Barcelona og Real Madrid royndu ávísu Barcelona-viðhaldsmennirnir at blenda Ronaldo, tá hann skuldi taka eitt fríspark uttanfyri brotsteigin hjá Barcelona.
Spanska ítróttarblaðið, AS skrivar, at Ronaldo, Pepe, Arbeloa og Casillas vóru raktir av lasarastráluni. Real-málverjin, Iker Casillas fortaldi dómaranum, Undiano Mallenco um lasaran, men dómarin nevndi ikki lasararastrálurnar í síni dystarfrásøgn.
Eric Abidal hjá Barcelona slóg alt upp í glens, og sigur við AS, at spælarnir hjá Barcelona eru somikið skjótir á fótum, at teir megnaðu at renna undan lasarastráluni.
Jorge Valdano, stjóri í Real Madrid segði við spanska ríkissjónvarpið, at hann lastar ikki FC Barcelona, men hann lastar tann ella tey, sum framdu ógerðina.
- Hetta má kannast fyrst og fremst, tí hetta er heilsuskaðiligt. Ronaldo var ikki raktur í eyguni, og tí fekk hann ikki nakran skaða, undirstrikar Valdano.
Fyri stuttum fekk italska felagið, Napoli 15.000 evrur í bót, tí nakrir áskoðarar hjá Napoli brúkti lasara ímóti einum spælara hjá mótstøðuliðnum.
Sambært einum øðrum sponskum ítróttarblaði, Marca høvdu Barcelona-áskoðarnir, sum brúktu lasara skipað seg, áðrenn stórdystin sunnudagin. Teir høvdu gjørt seg út við lasarum, sum eru átta ferðir sterkari, enn loyvt er.
Felix Navy, lækni hjá La Paz sjúkrahúsinum í Madrid sigur, at sterku lasarnir kunnu gera so stóran skaða á eyguni, at tað ber ikki til læknaliga at rætta uppá skaðan aftur.
