Annan ársfjórðing vóru brúkaraprísirnir 2,2 prosent hægri enn sama ársfjórðing í fjør. Brúkaraprístalið er nú 121,0 tað var 120,6 fyrsta ársfjórðing í ár, og 118,4 annan ársfjórðing í fjør.
Tað boðar Hagstovan frá fyrrapartin.
Prísirnir á orku eru hækkaðir mest og hava eisini mestu ávirkanina á brúkaraprístalið samanlagt. Brennioljan til húsarhald er farin 13,2 prosent upp, og ravmagn er farið 6,6 prosent upp. Prísirnir á brennievni til akfør eru hækkaðir 10 prosent.
Prísvøksturin í nýtslubólkunum ymiskar vørur og tænastur hevur verið 6,4 prosent. Tað eru gjøld fyri fíggjartænastur, sum eiga meginpartin av hesum vøkstrinum.
Árligi prísvøksturin á matvørur er minkaður og er nú 1,0 prosent sammett við 2,7 prosent fyrsta ársfjórðing. Tað eru bíligari grønmeti og frukt, sum hava tálmað prísvøkstrinum á matvørum samanlagt. Árligi prísvøksturin á kjøti og kaffi er enn stórur.
Mesta príslækkingin seinasta árið hevur verið í nýtslubólkunum klædnavørur og fótbúnaður og samskifti.
