Seks ensk fótbóltsfeløg eru millum tey 12 evropisku stórfeløgini, sum í nátt kunngjørdu ætlanir um at stovna sína egnu Super League.
Bretski forsætisráðharrin, Boris Johnson, sigur seg vera hart ímóti ætlanini og fer at gera sítt fyri at steðga henni.
– Ein evropisk Super League er ring tíðindi fyri viðhaldsfólki. Feløgini áttu at gjørt sum viðhaldsfólkið vil.
– Vit hyggja upp á alt, sum vit kunnu gera við fótbóltsmyndugleikarnar fyri at tryggja, at hetta ikki kemur víðari á hendan hátt, sum tað í løtuni er skotið upp, sigur Boris Johnson á tíðindafundi sambært Reuters.
Manchester United, Liverpool, Arsenal, Chelsea, Manchester City og Tottenham eru tey seks ensku feløgini, sum eru við í ætlanunum um útbrótarakappingina.
Tað fer at skaða Premier League, heldur Johnson.
– Ætlanir um eina evropiska Super League fara at skaða fótbóltin, og vit stuðla uppíblandingina hjá fótbóltsmyndugleikunum. Hesar ætlanir raka beint í hjartað á okkara heimligu kapping og fer at órógva viðhaldsfólk um alt landið, sigur Johnson.
Bæði Evropiska Fótbóltssambandi, Uefa, eins og nationalu sambondini hava raðfest, at feløgini og spælararnir, sum eru við í útbrótarakappingini ikki sleppa at spæla víðari í nationalu kappingunum, og spælararnir sleppa ikki við á landsliðini.
Tey 12 feløgini hava sambært AP tó sent bræv til eitt nú Uefa, har tey siga, at tey fáa løgfrøðisligan stuðul til at sleppa undan slíkum tiltøkum.
/ritzau/
