Meira enn ein mánað eftir ríkisdagsvalið í Svøríki er enn eingin stjórn skipað
Formaðurin hjá Moderaterna, Ulf Kristersson, hevur uppgivið í hesum umfari at skipa eina borgarliga stjórn í Svøríki.
Tað segði hann í dag á tíðindafundi, eftir at hann hitti formannin í Ríkisdegnum, tann sonevnda talmannin.
– Eg eri framvegis tilreiðar at gerast forsætisráðharri. Men eg havi boðið talmanninum frá, at tað í løtuni ikki letur seg gera, sigur Ulf Kristersson.
Eg haldi, at tað er spell, sigur hann víðari.
Valið í Svøríki í september gav eitt gruggut úrslit. Borgarligi vongurin, nevndur Alliansen, fekk tilsamans 143 ríkisdagslimir. Reyð-grøni vongurin fekk 144 ríkisdagslimir. Samstundis fingu Svørkisdemokratarnir 62 umboð, men eingin vil samstarva við innflytarafíggindaliga flokkin.
/ritzau/TT
