Føroyar høvdu eitt serstakt pláss í mínum hjarta langt áðrenn eg tók við sum amerikonsk sendikvinna í danska kongaríkinum. Í mínum ungu døgum í Pennsylvania plagdi eg at vera barnagenta hjá einari smágentu, sum eg havi havt samband við líka síðan tá. Hon giftist seinni við einum føroyskum manni. Tey bæði og teirra fýra døtur búgva nú í Tórshavn. Tá eg seinast vitjaði í Føroyum í november, fekk eg aftur møguleikan at hitta hana saman við hennara fittu familju og minnast aftur á góðar, gamlar dagar.
Eg havi altíð fegnast um gestablídnið hjá føroyska fólkinum og ikki minst um tann kærleika og ta virðing tit hava fyri gomlum siðum og vøkru nátturuni. Amerikonsk og føroysk mentan hava í roynd og veru nógv til felags. Átrúnaður og sjálvbjargni hava alstóran týdning fyri báðar tjóðirnar. Eitt annað, vit hava til felags, er okkara stóri áhugi í at verja okkara umhvørvi - í USA við at varðveita okkara tjóðarparkir og í Føroyum við eini burðardyggari ferðavinnu, sum skal verja tann framúrskarandi náttúruvakurleikan á oyggjunum og í sjónum rundanum.
Hesi trý árini, eg havi starvast sum sendikvinna, havi eg verið fimm ferðir í Føroyum, har eg havi fingið sjón fyri søgn um okkara nógvu felags áhugamál. Eg og mínir starvsfelagar á ambassaduni fingu skjótt eyga á fleiri góðar møguleikar og grundir til at styrkja samstarvið millum USA og Føroyar.
Eg eri errin av at hava umboðað amerikanska fólkið í tilgongdini at styrkja hesi bondini. Í juli 2020 var eg sum tað fyrsta amerikanska sendifólkið og vitjaði í Klaksvík. Ein av nógvu góðu upplivingunum frá tí túrinum var at koyra ígjøgnum Norðoyatunnilin og uppliva ta ótrúliga vøkru ljósinstallatiónina hjá heimskenda listamanninum, Tróndi Paturssyni. Eg var eisini boðin umborð á ein pelagiskan trolara, har eg veruliga fekk innlit í, hvussu stóran týdning fiskivinnan hevur fyri Føroyar. Hetta fekk meg samstundis at hugsa um teir stóru møguleikarnar fyri øktum handils- og íløgusamstarvi við USA.
Eitt tað besta dømið um hesar møguleikarnar er Bakkafrost, sum selur 17% av sínum samlaða laksaútflutningi til amerikanska marknaðin. Í ár gjørdi hendan fyritøkan eisini íløgur í eina amerikanska fyritøku, sum gevur arbeiði til meira enn 40 fólk í Clifton, New Jersey. Føroyski laksurin, ið verður borðreiddur á amerikonskum matstovum, verður av nógvum mettur at vera á allarhægsta støði fyri aldan laks. Vónandi fara vit at síggja enn meira handil landanna millum, so at føroyingar eisini sleppa at njóta nakrar av frálíku amerikonsku vørunum.
Vøkstur er eisini í talinum av privatum og almennum partaløgum millum londini bæði. Í 2020 skrivaði føroyska fyritøkan Ocean Rainforest sáttmála við amerikonsku stjórnarskrivstovuna Advanced Research Projects Agency - Energy. Saman fara partarnir at skapa dygdargóðar og kostnaðarvirknar hættir at gagnnýta havbiomassa.
Samstarvið millum USA og Føroyar um at verja arktiska økið er eisini økt munandi tey seinastu árini. Í 2019 vitjaði eitt amerikanskt herskip í Føroyum fyri fyrstu ferð í 30 ár, og vit gleða okkum til fleiri líknandi skipsvitjanir í komandi tíð. Slíkar vitjanir eru ein týðandi partur av hernaðardiplomatisku viðurskiftinunum millum USA og tess sameindu. Og vit fegnast um vaksandi viðurkenningina í Føroyum av stóra týdninginum av at tryggja avgerandi infrastruktur.
Eg eri vís í, at sambandið millum USA og Føroyar fer at styrkjast enn meira í framtíðini. Partalagsyvirlýsingin, sum báðar stjórnirnar undirskrivaðu í november, fer at styrkja samstarvið tjóðanna millum innan fleiri av okkara felagsáhugamálum - úr fyrisiting av sjótilfeingi og umhvørvisvernd til mentanarligt samstarv og burðardygga búskaparmenning, íverksetan, nýhugsan, ferðavinnu og handilsvirksemi. Hendan partalagsyvirlýsing, sum báðir partar hava bíðað eftir leingi, fer at slóða fyri ítøkiligum vøkstri í okkara handilssamstarvi, samstundis sum hon fer at styrkja bondini millum amerikanska og føroyska fólkið.
Eitt ógloymandi minni, nú eg fyrireiki meg at fara heimaftur úr danska kongaríkinum, er summarið 2019, tá eg slapp at síggja og hoyra føroyskan dans uttan fyri Tinganes á ólavsøku. Hetta vakra upplivilsið minti meg á sterka sambandið millum Føroyar og USA, har persónlig bond í túsundatali eru knýtt millum føroyingar or amerikanarar gjøgnum ferðing, útbúgving og arbeiði í báðum londunum.
Eg eri vís í, at eg fari at varðveita mítt persónliga samband við Føroyar langt eftir, at mín tíð sum sendikvinna er komin at enda.
Carla Sands, amerikonsk sendikvinna í Danmark
