Viðurkenningar fyri arbeiði hansara tróta ikki, sigur Havstovan í skrivi.
Bogi hevur millum annað havt greinar í altjóða vísindatíðarritunum Nature og Science, hann hevur fingið umhvørvisvirðisløn Norðurlandaráðsins í 2006 fyri umfatandi gransking innan veðurlag og havfrøði, og hann hevur eisini fingið yrkisbókmentavirðisløn M.A. Jacobsens í 2001 fyri bók sína Havið.
Hetta tí, at hann á sera dugnaligan hátt dugir at bera fram og flyta síni granskingarúrslit inn í tilveru og samtíð okkara.
Hetta er ikki einum og hvørjum granskara unt, og heldur ikki er tað einum og hvørjum granskingarstovni unt at hava slíkan úrmæling undir taki.
Bogi hevur við dugnaskapi sínum verið við at opna dyrnar út í heim, og vunnið sær sjálvum, Havstovuni og ikki minst Føroyum ta virðing, sum góð gransking hevur uppiborið.
- Tí er tað við gleði og stoltleika, at vit á Havstovuni kunnu líta 30 ár aftur í tíðina og fegnast um ta menning, stovnurin hevur verið í gjøgnum saman við góða starvsfelaga okkara Boga Hansen, sigur Havstovan.
