Fólkafloksmaðurin í Boga Andreasen fylti nú meira enn fullveldismaðurin – og tí mátti hann bíta í grasið og boða Høgna Hoydal frá, at eisini hann fór at svíkja Tjóðveldi – tó at hann fór aðra leið enn Sjúrður Skaale.
At tað loysir seg at hoppa flokk í flokk eru fleiri dømi um. Bogi Andreasen hevur helst lærumeistaran Heðin Mortensen sum stóru fyrimyndina. Bogi heldur nógv av honum, tað dylur hann ikki fyri, so hví ikki royna somu snildir, sum Heðin Mortensen hevur roynt tvær ferðir áður?
Sjúrður Skaale er eitt fekst dømi, Helena Dam á Neystabø eitt annað og Kristian Magnussen eitt triðja.
Men millum Fólkaflokkin og Tjóðveldi í Havn stendur nú á jøvnum. Við seinasta val hoppaði Jákup Símun Simonsen úr Fólkaflokkinum í Tjóðveldi, tó at hann ongantíð var fólkavaldur fyri Fólkaflokkin.
Nú lønir Fólkaflokkurin aftur við at taka Boga Andreasen.
Javnvágin í Tórshavnar býráð broytist, tó at samgongan ikki er í vanda. Áðrenn var tað 9-4 til samgonguna, nú verður tað 8-5, og tað broytir alt nevndarbýtið í býráðnum.
Vit mugu taka fyri givið, at tað verður Tjóðveldi, sum missir tað vald, sum samgongan missir, og soleiðis má flokkurin av við fleiri týðandi nevndarsessir.
Tann tyngsti er helst annar sessurin í fíggjarnevndini. Har sita Jógvan Arge og Marin Katrina Frýdal. Annar teirra má nú víkja fyri fólkafloksmanninum Boga Andreasen.
Í mentamálanevndinin má annaðhvørt Jógvan Arge ella Jákup Símun Simonsen nú víkja fyri fólkafloksmanninum Boga Andreasen.
Í Havnarnevndinin má Jákup Símun Simonsen ella Jógvan Arge má nú víkja fyri fólkafloksmanninum Boga Andreasen.
Í teknisku nevnd má Marin Katrina Frýdal ella Jákup Sìmun Simonsen má nú víkja fyri fólkafloksmanninum Boga Andreasen.
Borgarstjóri og varaborgarstjóri eru valdir fyri fýra ár. Varaborgarstjórasessin ætlar Bogi Andreasen at taka við sær í Fólkaflokkin, sum nú verður næststørstur eftir Javnaðarflokkin, og tí man halda seg eiga varaborgarstjórasessin – tó at hann er valdur við tjóðveldisatkvøðum.
