Í gjárkvøldið var fitt av vindi við nokk so hørðum hvirlum og tað elvdi til, at tær risastóru takpláturinar á nýggja uppsjóvarvirkinum hjá Varðanum á Tvøroyri, tóku at loysna.
Einar 10 plátur vóru um at loysna og boð vórðu vend eftir Suðuroyar Norðara Bjargingarfelag, sum fór á staðið og festi pláturnar aftur, áðrenn tær fóru á flog og kundi elvt til stóran skaða.
Men í dag er framvegis vindur og tær eru við at loysna einaferð afturat, so bjargingarliðið er aftur boðsent í morgun og teir eru nú í ferð við at tryggja pláturnar enn betri.
Hann sigur upp í 16 metrar um sekundið av útsynningi í dag og í nátt snarar hann upp í ytnyrðing og veksur upp í 18 metrar umn sekundið
Tá ið Bjargingarfelagið í Hvalba var á veg á upp á Tvørouri í gjárkvøldið í skundi, við fullum útrykning, hendi tað óhepna, at tann eini bilurin steðgaði brádliga upp og fekst ikki at starta aftur.
Menninir í honum máttu so yvir í aðrar bilar fyri at sleppa upp á Tvøroyri
Myndirnar hevur Rúni Thomsen tikið.
