Kim Simonsen
Einaferð var motorsúkklan eitt ikon, ið umboðaði okkurt vandamikið. Vit minast øll filmin frá 1969, Easy Rider, sum er hin ultimativi motorsúkklu road-filmurin, sum er gjørdur. Tá var tað, at koyra motorsúkklu tvørtur um USA uttan kort ella ætlan ein partur av einum heilum dreymi, har Harley Davidson motorsúklan stóð fyri frælsi, uppreistri og at vera ein koolur og farligur outsidari. Í 2007 er motorsúkklueigarin í USA (og í Føroyum) nakað heilt annað enn ein rokkari, men ein sum koyrir við stóru motorsúkklini hvørt vikuskiftið og spælir kool saman við hinum pápunum, sum allir eru ”vikuskiftisrokkarar”.
Søgan í hesum filminum er um fýra miðaldrandi menn, ið leingi hava koyrt motorsúkklu í frítíðini. Teir eru allir forsyrgjarar, rein miðalstætt allan vegin í bankan, tannlæknar og teldufrøðingar og so framvegis, sum hvønn dag fara heim til konu og børn. Teir eru góðir pápar og hampamenn, men tá vikuskiftið kemur, so fara teir í leðurklæðir og fara út at koyra Harley Davidson sum ”vikuskiftisrokkarar”.
Menn í kreppu á miðari leið í lívinum
Teir eru allir banginir fyri at gerast gamlir og fyri at øll halda teir vera nakrir mammusadreingir. Doug, sum er tannlækni, er bangin fyri, at hann er endaður sum eitt miðaldrandi grenj. Bobby, sum er bikksmiðjur, er bangin fyri konuni. Nørdurin og telduforritarin Dudley er bangin fyri at tosa við konufólk. Hin koolasti av teimum øllum er gulldrongurin Woody, hann er advokatur og hevur eina konu, sum er fotomodel (tað sum vinirnir ikki vita, er at kona Dudley er rýmd, og felagið hjá Dudley er farið á húsagang).
Teir kalla seg Wild Hogs, men allir líða av kreppuni á miðjari leið í lívinum, tær sum serliga leggja seg á menn tá teir gerast 40 ella 50.
Teir sita á einari falskari rokkarabar og drekka mocachino og koyra motorsúklu við hjálmi og tosa um partabrøv. Woody fær teir tó allar at koma við á eina stóra episka roadferð til California. Tað er ikki so torført at fáa hesar kreppuraktu menn at blaka tamarhaldið og ábyrgdina eina løtu. Teir droyma allir um at endurfinna eina rest av teirra mista ungdómi og dreymin um frælsið á opnu vegunum – born to be free. Men frælsið kostar, og tað er ikki so lætt at koma sum eitt hentleikadjór frá forstøðunum og enda úti í oyðimarkini millum veruligari motursúklurokkarar.
Tryggi motorsúkluromantikkurin endar skjótt sum sosialrealisma, og við eitt er bæði ein samkyntur løgreglumaður og ein heilur rokkarabandi eftir teimum.
Filmurin Wild Hogs er ein stuttligur roadfilmur, fyltur á tremur við kendum og góðum leikarum sum John Travolta, Tim Allen, Martin Lawrence, William H. Macy og einum fínum Ray Liotta, sum spælir ein psykotatur og ein rokkaraleiðari. Onkunstaðni missir filmurin tó flogið, men undirhaldandi er hann so í hvussu so er.
3 stjørnur av 6
Wild Hogs
Leikandi:
Doug MadsenTim Allen
Woody StevensJohn Travolta
Bobby DavisMartin Lawrence
Dudley FrankWilliam H. Macy
JackRay Liotta
MaggieMarisa Tomei
Leikstjóri Walt Becker. Frumframførdur í Havnar Bio fríggjadagin 13. apríl.
