Hvar verða jólini hildin í ár?
- Í ár verða jólini hildin á Syðradali.
Tað sigur Bjørn Kalsø.
Hvat verður á borðinum jólaaftan og jóladagarnar annars?
- Jólaaftan verður dunnu og gás á borðinum. 1. jóladag rokni eg við, at ein ræstur biti fer í pottin, og 2. jóladag fer helst feskt kjøt í ovnin.
Keypir tú jólagávur?
- Í ár hevur konan, sum so mangan áður, keypt flestu jólagávurnar í góðari tíð.
Hvønn týdning hava jólini fyri teg?
- Fyri meg hava jólini stóran týdning, tí tá er familjan savnað - í hvussu er onkran av døgunum. Jólini eru barnahátíðin, og nú abbabørn eru løgst til, ger tað bara jólini enn betur!
Bjørn Kalsø vísir á, at á Sydradali býr ein jólamaður í Øskuskotinum í Urðini oman fyri bygdina, og hann plagar at leggja pakkar har uppi til børnini.
- Eg rokni við, at øll fara ein túr niðan í Øskuskotið at kanna, um nakar pakki er. Kanska kakao og bollar verða við í skjáttuni.
Bjørn Kalsø sigur, at farið verður eisini í hugnaligu kirkjuna á Húsum á jólum.
- Vit ynskja øllum føroyingum eini gleðilig jól og eitt eydnuberandi nýggjár, leggur hann aftrat.
