Í desember og januar kunnu lesandi ókeypis brúka hølini á Fjarlestrardeplinum í Vági í sambandi við lesnaðin.
Desember og januar er tíðin, har nógv lesandi eru heima og halda jól. Men hetta er eisini tíðin, har lesandi hava nógv á skránni, bæði tá umræður at skriva uppgávur, gera ritgerðir og lesa til próvtøku.
- Vit vilja við hesum bjóða útisetum vælkomnum heim til jóla og vilja samstundis bjóða lesandi at brúka hølini á Fjarlestrardeplinum í samband við lesnaðin, sigur Dennis Holm, borgarstjóri í Vágs kommunu.
Á Fjarlestrardeplinum eru góð hølisviðurskifti og allir hentleikar, sum lesandi annars hava tørv á, so sum internet, printari, kopimaskina og so framvegis.
