Barnagarðurin á Mýrunum í Runavík, sum hevur 10 ár á baki og sum liggur í sera náttúruvøkrum umhvørvi, er teknaður av arkitektum - júst til ætlaða endamálið.
Tey, sum standa aftan fyri barnagarðin, ið liggur beint niðan av Toftavatni, bjóða nú fólki inn á gólvið at vitja, meðan mentanarvika er í Runavík.
- Vit bjóða bæði íbúgvum í Runavíkar kommunu, sum eiga barnagarðin og teimum, sum koma á mentanarviku, inn á gólvið at vitja okkum týsmorgunin og hósmorgunin - í tímunum millum klokkan 8 og 11.
Lagt verður aftrat, at fók, sum hava áhuga fyri at síggja flotta barnagarðin, skulu fara inn gjøgnum høvuðsdyrnar, har leiðarin tekur ímóti.
- Síðan bjóða vit eina rundvísing á stovninum, har starvsfólk saman við børnum vísa fram stovurnar, sum børn og starvsfólk starvast í til dagligt.
Í Barnagarðinum á Mýrunum verður eisini ókeypis café í Stórustovu.
- Vit gleða okkum til at taka ímóti øllum, sum koma á gátt, siga bæði stór og smá saman við foreldraráðnum í Barnagarðinum á Mýrunum.
