Nú er íslendska Birna funnin deyð og tað hevur fingið millum annað Bjarna Benidiktsson, formann í sjálvstýrisflokkinum í Íslandi og forsætismálaráðharra at siga nøkur orð til tjóðina.
Tí tað er vist, at syrgiliga lagnan hjá Birnu hevur rakt alla tí íslendsku tjóðina.
- Fyri beint yvir einari viku síðani kom Birna Brjánsdóttir ikki heim sum ætlað. Síðani hevur verið leitað eftir henni. Løgreglan hevur arbeitt hart fyri at finna hana, og teirra ógvuliga miðvísa arbeiði hevur verið væl úr hondum greitt, og somuleiðis hevur teirra samskifti við miðlarnar verið gott. Nógv hava leitað eftir Birnu og givið upplýsingar til løgregluna. Hendan tragiska hendingin hevur rørt tjóðina, rørt okkum øll somul, og vit vónaðu, at tað ikki fór at enda soleiðis. Men nú er Birna funnin og vit savnast sum tjóð í sorg. Við samkenslu til familjuna hjá Birnu, skrivar hann á sosialu miðlunum.
