19 ára gamla Bjørk Herup Olsen hevur nú vunnið sítt fyrsta heiðursmerki á Oyggjaleikum. Fyri tveimum árum síðani varð hildið, at hon kundi gera seg galdandi í heiðursmerkjastríðnum, men í 10.000 metrum kiksaði hon. Tann kappingin var eitt stórt vónbrot og hevur verið trupul at leggja aftur um seg. Tí var trýst á Bjørk Herup Olsen, tá ið hon í gjár kappaðist í hálvum maraton. Hon hevði fyri kappingina sagt, at hon ætlaði sær heiðursmerki og vildi kappast um gullið.
Helt seg til sína ætlan
Hálva maratonið varð runnið í góðum og lýggjum veðri sunnumorgunin. Tríggjar aðrar kvinnur løgdu hart út, og tað fekk Bjørk at ivast í, um hon skuldi halda seg til sína ætlan ella ikki.
– Eg ivaðist í, um eg skuldi fara aftan á teimum, men eg valdi at renna mítt egna tempo, sigur hon.
Fyri tveimum árum siðani byrjaði hon renningina í 10.000 metrum í sera høgum tempo, men móti endanum av kappingini megnaði hon ikki at halda ferðini og datt mest sum niður ímillum.
Hesaferð varð øðrvísi.
– Eg lá leingi nummar fýra, men tá tað var hálvur annar kilometur eftir, fór eg fram um hana, sum hevði verið nummar 3, og eg helt meg frammanfyri hana seinasta teinin, sigur Bjørk Herup Olsen.
Hon var sera fegin, tá ið hon kom um málstrikuna og harvið prógvaði fyri sær sjálvari og øllum hinum, at hon kann vinna heiðursmerki á Oyggjaleikum.
Bjørk kom í mál við tíðini 1:24:35, og tað er føroyskt met. Bjørk skal seinni í vikuni renna aðrar tvær aðrar kappingar.
