Herfyri lýsti Hvannasunds kommuna tvey grundstykki í Hvannasundi, matr. 93h og matr. 93i til sølu, og nú veit kommunan at siga, at hesi grundstykki eru umbiðin.
- Vit arbeiða við at útvega okkum onnur grundstykki í Hvannasundi. Um áhugi er at koma á ein bíðilista, eru fólk vælkomin at senda ein teldupost til kommununa.
Í Hvannasunds kommunu leggja tey aftrat, at arbeitt verður eisini við at gera ætlanir fyri matr. nr. 146a í Norðdepil, so grundstykki eisini kunnu útvegast her.
Grundstykkini, sum kommunan herfyri lýsti til sølu í Hvannasundi, vóru ávikavist 654 og 617 fermetrar stór, og hesi vóru til sølu fyri 45.126 og 42.573 krónur.
Bæði grundstykkini liggja við blindan veg og í náttúruvøkrum umhvørvi.
Í Hvannasunds kommunu er barnagarður við vøggustovu og frítíðarskúli, eins og barnaskúli er frá 1. til 7. flokk. Í kommununi er barnaansingin ókeypis.
