Bilrøkt úr einum upp í 17 starvsfólk eftir átta árum

Feðgarnir Jákup og Heini á Borg Hava Hesi seinastu 10 árini rikið Bilfyritøkuna Bilrøkt, sum heldur til í Stiðjagøtu í Havn.

Tað hevur gingið væl hjá teimum báðum. Teir byrjaðu í tí smáa, og hava vaksið um virksemið so við og við, sum møguleikarnir hava víst seg. At slíkt árræði lønar seg, sæst væl í dag, nú 10 ár eru liðin, síðan fyritøkan byrjaði sítt virksemi.

Bilrøkt er í dag eitt stórt privat arbeiðspláss við 17 starvsfólkum og umfatandi virksemi við øllum tænastum til bilar, herundir sølu, leigu, umvæling og aðrar tænastur til bilar. Hetta er er í dag vørumerki hjá Bilrøkt.

Tað sum byrjaði við einum starvsfólki í 2005, tveimum í 2006 er vaksið á hvørjum ári síðani, og eisini í 2014 har tað nú eru 17 fólk í starvi hjá Bilrøkt.

Raksturin kastar eisini meira av sær, og sæst hetta millum annað aftur í at bruttovinningurin hækkaði við 20 prosentum í 2014, tá samanborið verður við árið frammanundan.

Í 2008, mitt meðan kreppan leikaði upp á tað harðasta, keypti Bilrøkt bygningin, har húsast verður. Síðan er bygningurin dagførdur og útbygdur so við og við, og meir er keypt afturat av øki rundanum.

Lesið eisini: Bilrøkt selt flutningsvirksemið til Ansni

Hesi seinastu trý árini hevur Bilrøkt og Bilrøkt Fastogn, sum eigur sjálvan bygningin húsast verður í, havt eitt avlop áðrenn skatt upp á eina góða milljón krónur í meðal um árið.

Eginognin hjá Bilrøkt og Bilrøkt Fastogn er í dag 4 milljónir krónur samanlagt. Eginognin var við byrjan í 2005 80.000 krónur.

Bilrøkt Sp/f:

Høvuðstølini hjá Bilrøkt Sp/f seinastu tvey árini. Bruttovinningurin hækkaði við 20 prosent í 2014 og úrslitið áðrenn skatt kom uppá 712.000 krónur í 2014.

_{_____________________________________________________
Úr Vinnuni í Sosialinum 24. september, greining, Eyðfinn Reyðberg}