Hvønn hósdag klokkan 16.05 er Bilradio at hoyra á Rás2. Sendingin er væl umtókt millum lurtarar, og nógv fólk nýta høvið at hoyra ella endurhoyra sendingina tá hon verður endursend á Rás2 leygardagar.
Vanliga verður sendingin endursend klokkan 13 leygardagar, men vegna Tunnilsradio varð sendingin hesa ferð flutt til klokkan 11. Tað varð í øllum førum lýst við.
Tá klokkan gjørdist 11 nú leygardagin mundu fleiri klóra sær í nakkanum tá bert tónleikur var at hoyra og einki Bilradio. Heldur ikki klokkan 13, tá sendingin vanliga verður endursend, kom Bilradio á skránna.
Hendiligt óhapp
Jonhard Hammer, stjóri á Rás2, hevði onga viðmerking til hvør orsøkin er, at sendingin ikki varð send, men sum skilst er tann feilur hendur, at tøkningarnir á Rás2 hava verið í teirri góðu trúgv um hvønn annan, at onkur av hinum mundi hava lagt hana inn í skipanina. Soleiðs var tó ikki, og sendingin kom ongantíð inn í skipanina, og tískil heldur ikki í luftina.
Sostatt kann bara staðfestast at hendiligt óhapp eisini var orsøk til at lurtarar hjá Rás2 vórðu snýttir fyri eina sending, og at Bilradio punkteraði á vegnum.
