Bill Justinussen, løgtingsmaður hjá Miðflokkinum, hevur sett Jacob Vestergaard tveir 52a fyrispurningar.
Løgtingslimurin í Eysturoynni vil gjarna hava landsstýrismannin at svara sær, hvat landsstýrið ger fyri at basa trupulleikanum við fremmandum skaðadjórum og -plantum. Í hesum sambandi nevnir hann morsnigilin og skøruna sum tvey góð og viðkomandi dømi.
Í øðrum lagi spyr hann um nakrar konkretar ætlanir eru, at forða fyri at fleiri slík djóra- ella plantusløg koma inn í landið, og nevnir, at Ísland hevur eydnast væl við sínum politikki á hesum økinum.
- Eru ætlanir um við lóg at steðga innflutningi av fremmandum vøkstri og djórum fyri at verja føroyska náttúru og umhvørvi?
