Klaksvík:
Tað er Kirkjutorgið, sum skipar fyri hesum treffinum eftir fleiri áheitanum frá fólki. Fólk kenna Bill Gaither kanska serliga frá sjónvarpinum. Sjónvarpið plagdi at senda lovsongsløturnar við Bill og Gloriu Gaither sunnukvøld, men nú eru tær so tiknar av skránni. Síðani hevur Kirkjutorgið móttikið nógvar áheitanir um at skipa fyri einum Bill Gaither treffi.
Hans Eiler Hammer, sóknarprestur, sigur, at hesar løtur eru lovsongsløtur upp á tað besta.
- Millum føroyingar og okkara sjómenn er hetta ein "bestseljari", sigur hann og leggur samstundis afturat, at tey gjørdu av at skipa fyri hesum tiltaki, tí tey hava fingið fleiri fyrispurningar.
Hans Eiler sigur eisini, at jólatíðin er ein vøkur tíð, men samstundis ein strævin tíð, har fólk renna og tuska fyri at blíva liðug til jóla.
- Vit vilja tí bjóða fólki til at slappa av og njóta hesar vøkru tónar nú mánakvøldið, sigur hann.
Bill og Gloria Gaither geva út sera vælumtókt gospelløg á video, fløgum og nú eisini á DVD. Tey savna trúgvandi menniskju frá Ameriku og aðra staðir við til at syngja saman.
Tiltakið byrjar klokkan 17, og byrjað verður við at sýna lovsongsløtuna " I´ll fly away". Kl. 19 verður "Billy Graham, volume 1" og at enda klokkan 21 sýna vit " New Orleans Homecoming".
Allar sýningar verða vístar á stórskíggja og kostar tiltakið 20 krónur fyri allar sýningarnar.
Kaffi verður til keyps og eisini hópin av Bill Gaither bondum. Alt tiltakið varar frá klokkan 17 til 23.
