Strong umhvørviskrøv hjá myndugleikunum hava gjørt, at teir nýggju bilarnir dálka væl minni enn teir eldru. Tøl hjá ES vísa, at teir nýggju bilarnir, sum vórðu keyptir í 2011, dálka trý prosent minni enn teir, sum vórðu keyptir í 2010.
ES-tølini siga, at í 2010 var meðaltalið 140,3 CO2 g/km og í fjør 135,7. Samstundis vísa tølini, at bilarnir, sum vórðu seldir í 2010, dálkaðu fýra prosent minni enn teir, sum vórðu seldir í 2009.
Nógvir av bilunum, sum verða seldir í Evropa, eru eisini gjørdir í Evropa, og tað er líkt til, at verksmiðjurnar kappast um at gera bilar, sum dálka minni. Nýggjar reglur hjá ES siga, at í 2015 skulu nýggir bilar ikki dálka meiri enn 130 g/km. Annars verða teir sektaðir.
