Forsetin í USA, Joe Biden, hevur boðið komandi forsetanum, Donald Trump, at vitja í Ovala kóntórinum.
Tað boðar talskvinnan hjá Biden, Karine Jean-Pierre, frá.
Tað verður mikudagin klokkan 11:00 lokala tíð. Tað er klokkan 16:00 okkara tíð.
Fleiri upplýsingar eru ikki komnir frá tíðindatænastuni í Hvítu Húsunum.
Fundurin verður tann fyrsti millum leiðararnar báðar, eftir at teir hittust til sjónvarpskjak í juni. Her kláraði Joe Biden seg so illa, at bæði politiskir viðmerkjarar og hansara egni flokkur løgdu stórt trýst á hann um at taka seg aftur.
Í staðin varð núverandi varaforsetin, Kamala Harris, skjótt vald sum forsetavalevni hjá demokratunum.
Trump vann ein sannførandi sigur á amerikanska forsetavalinum týsdagin á Harris.
Hann gerst sostatt bæði undanmaður og eftirmaður hjá Joe Biden í forsetaembætinum.
Harris og Biden hava bæði sagt, at tey vilja arbeiða fyri eini friðarligari og skipaðari valdsflyting.
Tað stendur í andsøgn við avhendingina í 2021, tá Trump fór úr Hvítu Húsunum uttan at hitta Biden ella enntá viðurkenna tapið.
Trump hevur enn ikki viðgingið, at hann tapti valið fyri fýra árum síðani.
Áðrenn Biden varð settur í starvið, høvdu stuðlarnir hjá Trump lopið á kongressina í eini roynd at steðga formligu viðurkenningini av valsigrinum hjá Biden.
Trump breyt eisini normar og siðvenjur við ikki at vera til staðar, tá Biden varð tikin í eið 20. januar 2021.
Eftir ætlan verður Trump svorin í eið sum 47. forseti í USA á einum hátíðarhaldi í Washington, D.C. 20. januar 2025.
Inntil tá arbeiða Trump og hansara skiftistoymi væntandi við at fyrireika seg til hansara tíðarskeið frá heiminum í Florida, frítíðarstaðnum Mar-a-Lago.
/Ritzau/
